Fáar kvinnur í leiðandi størvum

Fiskivinnufyritøkan Vinh Hoan í Vjetnam er einasta fiskivinnufyritøka millum tær 100 størstu í heiminum, har sum kvinnurnar eru í meiriluta í nevnd og stjórn.

Forstjórin er kvinna og tíggju av tólv fólkum, sum stýra vjetnamesisku fyritøkuni, eru kvinnur.

Sjeynda hvør ein kvinna

Tað sigur ein kanning, sum altjóða felagsskapurin hjá kvinnum í fiskivinnuni, Women in the Seafood Industry, hevur gjørt.

Sambært kanningini, sum er um 2019, eru 14,4 prosent teirra, sum stýra 100 teimum størstu fiskivinnufyritøkunum í heiminum kvinnur.

Kanningin sigur eisini, at triðju hvørjari fyritøku stýra bara menn. Og bara í fimm prosentum eru fleiri enn 40 prosent kvinnur í stýrandi sessunum.

Noreg hevur lóggivið

Ymiskt er, hvussu nógv fyritøkurnar vilja siga. Av 100 størstu fiskivinnufyritøkunum fingust bara nóg nógvar upplýsingar frá 80 teirra til, at tær kunnu brúkast í kanningini.

Noreg var fyrsta landið í heiminum, sum við lóg kravdi, at minst 40 prosent av teimum, sum stýra fyritøkum, eru kvinnur.

Tann lógin kom í 2003. Hetta eru nevndarlimirnir. Verri er statt við stjórum í Noregi. Har eru kvinnurnar í mesta lagi 33 prosent.