Menn spara meira saman til pensjón

Menn í Føroyum hava eina pensjónssamansparing, sum er 25 prosent størri enn hjá kvinnum. 

Tað vísa nýggj tøl hjá BankNordik.

Tølini vísa eisini, at kvinnur, sum búgva aðrastaðni enn í Tórshavnar kommunu, hava lægstu pensjónssamansparingina.

Munurin á pensjónini hjá kvinnum og monnum er størstur millum tey, sum búgva uttan fyri Tórshavnar kommunu. Har hava menn eina pensjónssamansparing, sum er 38 prosent størri enn hjá kvinnunum. 

12 prosent meira

Hyggja vit at muninum millum kynini í Tórshavnar kommunu, hava menn eina pensjónssamansparing, sum er 12 prosent størri enn hjá kvinnunum. 

Tað er so at siga eingin munur á pensjónssamansparingini millum menn í høvuðsstaðnum og uttan fyri Havnina, meðan munurin millum kvinnurnar er lutfalsliga stórur. 

Kvinnur í miðstaðarøkinum hava eina pensjónssamansparing, sum er 23 prosent størri enn hjá hinum kvinnum aðrastaðni í landinum.