Vil kunna seg um málið fyrst

Nýggi formaðurin í Føroya Tele eitur Bjarni Arnason.

Hann varð valdur í nevndina á eykaaðalfundi í gjár, og bleiv síðani formaður.

Bjarni Arnason vil einki siga enn um ætlanir sínar í formanssessinum í Føroya Tele. Hann vil hava nakrar dagar at kunna seg um tað, sum hendir í Føroya Tele, sigur hann.

Ómar Svavarsson, sum var nevndarformaður í Føroya Tele, segði seg úr nevndini 4.september.

Stjórin í Føroya Tele, Jan Ziskasen, segði eisini upp tá. 

Men hann er í starvinum enn, tí hann hevur seks mánaða uppsagnartíð.

Johnni M. Poulsen, næstformaður, var virkandi formaður í nevndini hjá Føroya Tele til í gjár. 

Avgreiða stjórastarvið

Eitt tað fyrsta, sum nýggi formaðurin í Føroya Tele skal avgreiða, er stjórastarvið.

Nevndin setur og loysir úr starvi stjóra felagsins.

Bjarni Arnason er 50 ára gamal og útbúgvin cand.merc.aud., grannskoðari, í CBS, Copenhagen Business School.

Síðani 1989 hevur hann starvast sum granskoðari, har hann hevur grannskoðað og ráðgivið bæði stórum og smáum fyritøkum.

Hann hevur millum annað verið grannskoðari hjá Kalli. 

Bjarni Arnason eigur í dag ein part av granskoðanarvirkinum NUMO, har hann eisini er stjóri.

Landsstýrið velur fýra fólk í nevndini hjá Føroya Tele.

Tey eru Bjarni Arnason, Johnni M. Poulsen, Annbritt Tummasdóttir Nielsen og Lena L. Mohr.

Harafturat velja starvsfólkini tríggjar nevndarlimir.