Stórur tørvur á arbeiðsmegi í Grønlandi

Grønland hevur tørv á arbeiðsmegi, serliga í byggivinnuni, men eisini í tænastu- og flutningsvinnuni, ferðavinnuni og gistingarhús- og matstovuvinnuni.

Tað skrivar Sermitsiaq í dag.

Tað er Grønlands Erhverv, sum hevur gjørt eina kanning av grønlendska arbeiðsmarknaðinum. Grønlands Erhverv er tað sama sum Vinnuhúsið er í Føroyum.

568 starvsfólk

Kanningin vísir, at tørvur er á 568 starvsfólkum. Tað er nakað minni enn í eini samsvarandi kanning frá 2018, tá talið var 977. Minkingin hevur allarhelst samband við koronufarsóttina, verður sagt í niðurstøðuni í kanningini.

Men kanningin vísir eisini, at serliga tvær vinnugreinar hava nógv størri tørv á arbeiðsmegi nú enn í 2018. Tað eru bólkarnir "bygningshandverkarar" og "tænasta og flutningur". 

Annars vísir kanningin eisini, at grønlendskar fyritøkur sóknast eftir eini betri útbúnari grønlendskari arbeiðsmegi umframt smidligari atgongd til útlendska arbeiðsmegi.