Føroyskar bankadeildir í Danmark fáa ikki fyrimun

ES-reglur gera, at Fíggjareftirlitið í Danmark kann ikki geva deildum hjá føroyskum bankum í Danmark fyrimunir, sum deildir hjá bankum í ES-londum ikki fáa.

Somu reglur eru galdandi í Danmark fyri føroyskar bankadeildir sum fyri deildir hjá bankum í ES-londum.

Tað sigur Simon Kollerup, vinnumálaráðharri, í svari til Sjúrð Skaale, fólkatingsmann. Ráðharrin hevur fingið Fíggjareftirlitið at svara spuringinum um føroyskar bankadeildir í Danmark.

Skulu halda danskar reglur

Svarið er, at føroyskar bankadeildir í Danmark skulu halda reglurnar í donsku lógini um brúkara- og íleggjaravernd og reglurnar um hvítting.

Men Fíggjareftirlitið hevur ikki serstakt eftirlit við solvensinum, gjaldførinum, hjá bankadeildini.

Tað merkir, at kapitalur, gjaldføri og aðrar reglur, sum hava samband við, hvussu krøvini um kapitalin og gjaldføri skulu roknast út, eru sambært føroysku reglunum.  

BankNordik hevur selt alt sítt virksemi í Danmark. Orsøkin er stóra kapitalkravið, sum skerjir kappingarførið hjá bankanum í Danmark, sigur bankin.