- Tíðindi, mentan og ítróttur
KÍ, HSF ella Kurvabóltssambandið fær viðurkenning
KÍ, Hondbóltssamband Føroya og Kurvabóltssamband Føroya eru í uppskoti til heiðurin sum ítróttafelagskapurin 2020, sum verður latin á ítróttafagnaðinum hjá Ítróttarsambandinum 13. februar.
Hesin heiður verður latin feløgum ella sambondum, sum gera eitt gott ítróttaligt og samfelagsligt arbeiði, skrivar ÍSF.
Í grundgevingunum verður sagt um KÍ, at 'professionalisma eyðkennir felagið, bæði tá talan er um venjarar, leikarar og umstøðurnar sum heild.'
Um Hondbóltssambandið verður sagt, at 'HSF torir at droyma stórt og seta sær framsøkin mál.'
Um Kurvabóltssambandið, sum var stovnað sum menningarsamband fyri nøkrum árum síðan, verður skrivað í grundgevingunum, at 'sambandið hevur síðan tá verið eitt sera virkið samband, sum støðugt hevur arbeitt við at menna og økja áhugan fyri kurvabólti í Føroyum.'
Umframt sjálvan heiðurin fær ítróttafelagsskapurin 2020 eina peningaupphædd upp á 15.000 krónur. Ítróttafagnaðurin verður sendur beinleiðis í sjónvarpinum hjá Kringvarpi Føroya leygarkvøldið 13. februar kl. 19.30.