Katalonia: Loysingarrørslan styrkir støðuna

Loysingarrørslan styrkir støðu sína í tinginum í spanska landspartinum, Katalonia.

Tað vísir úrslitið av valinum í gjár, nú 99 prosent av atkvøðunum eru tald.

Teir tríggir loysingarflokkarnir fáa tilsamans 74 av 135 tingfólkum í tinginum

Sosialistaflokkurin hjá Pedros Sanches, forsætisráðharra í Spania, fær flest tingfólk. 

Lýsti Katalonia sjálvstøðugt

Valið í gjár var hálvt fjórða ár eftir, at loysingarstjórnin hjá Charles Puigdemont skipaði fyri einari fólkaatkvøðu um loysing frá Spania, og lýsti Katalonia at vera sjálvstøðuga tjóð.

Hetta elvdi til nógvan ófrið, og Puigdemont flýddi til Belgia fyri ikki at vera handtikin, men níggju aðrir politiskir leiðarar vórðu fongslaðir í oktober 2019 fyri sín leiklut í loysingarroyndini.

Hóast nógva ófriðin, sum var í kjalarvørrinum av loysingarstríðnum, er spurningurin um loysing í Katalonia ikki so nógv á breddanum nú, skrivar The Guardian.

Orsøkin er, at fleiri av loysingarrørslunum kunnu ikki semjast innanhýsis um leistin, skrivar blaðið.