Fleiri enn 1.000 tilburðir í eitt samdøgur

Fyri fyrstu ferð eru fleiri enn 1.000 fólk í Noregi skrásett at vera smittað av koronu í einum samdøgri.

Tilsamans eru 1.156 fólk smittað síðsta samdøgrið, boða heilsumyndugleikarnir í Noregi frá.

Metið frammanundan var 6. januar, tá ið 930 fólk vórðu smittað.

Triðja bylgja

- Vit hava fingið eina triðju bylgju. Men vit skulu eisini klára at vinna á henni, sigur Bent Høie, ráðharri í heilsu- og umsorganarmálum.

Tað er serliga í Oslo, at smittan ger um seg. 495 fólk eru smittað í Oslo síðsta samdøgrið.

Í løtuni eru 224 fólk í Noregi innløgd, tí tey eru sjúk av koronu. 641 fólk eru deyð av koronu, síðani farsóttin kom til Noregs fyri einum góðum ári síðani.  

Noreg hevur hert tiltøkini fyri at avmarka smittuna. Serliga í Oslo eru nógvar avmarkingar.