Varðhaldsfongslingin longd fýra vikur

Maðurin, sum er skuldsettur fyri at hava barnapornografiskt tilfar í varðveitslu, skal vera í varðhaldi í fýra vikur afturat.

Maðurin góðtók sjálvboðin, at varðvaldið varð longt. 

Maðurin, sum er fyrst í 30-unum, varð í oktober í fjør tikin í sambandi við, at løgreglan kannaði ferðafólk, sum komu við Norrønu. 

Løgreglan fann rúsevni uppi á manninum, og hann varð tí handtikin.

Telefon og telda hjá manninum vórðu kannað, og har fann løgreglan nógv barnaporno.

Blygnaðarskemd

Maðurin er eisini skuldsettur fyri blygnaðarskemd, og fyri at hava gjørt seg kynsliga inn á børn undir 12 ár, kortini er talan ikki um samlegu. 

Og hann skal í tveimum førum hava tikið myndir av einum barni, meðan tað svav og tí ikki kundi verja seg.

Maðurin er mentalkannaður, og mentalkanningin er send danska rættarlæknaráðnum til ummælis. Bíðað verður nú eftir svari haðani, og tá tað kemur, er málið klárt at fara í rættin.