Jarðhiti hitar ráðhúsið

Hiti, ið fæst upp úr trimum 300 metrar djúpum holum, hitar nú ráðhúsið hjá høvuðsstaðarkommununi á Vaglinum í Havn.

Fyrradagin varð jarðhitin tendraður, og ein jarðhitapumpa hitar nú allan tann stóra bygningin hjá Tórshavnar kommunu á Vaglinum og brúksvatnið.

Útlátið minkar 50-75 prosent

Við jarðhitanum er metta elnýtslan 40-50.000 kilowatttímar um árið, og CO2-útlátið fer at minka við 50 - 75 prosentum, væntar kommunan.

Bara í fjør brúkti høvuðsstaðarkommunan 15.119 litrar av olju til at hita Ráðhúsið á Vaglinum við.

Umleggingin er partur av einum orkuátaki hjá Tórshavnar kommunu, sum hevur til endamáls at leggja kommunalar bygningar um til grønar orkukeldur.