Ørkin fekk koronustuðul

Ørkin er eitt hotel, sum føroyskt stovnaður hjálpargrunnur rekur í Reykjavík. Endamálið við Ørkini er millum annað at vera eitt andaligt og sosialt heim fyri føroyingar, sum búgva í Íslandi, fyri lesandi, sjómenn og fólk, sum koma til Reykjavíkar í sjúkraørindum.

Ørkin er eisini karmur um fundarvirksemi hjá Føroyingafelagnum í Reykjavík og fyri skúla í føroyskum fyri børn í Reykjavík.

Sambært vinnunevndini hjá løgtinginum, sum viðgjørdi hjálparpakkan til ferðavinnuna, so vóru útlit til, at Ørkin datt niðurímillum hjálparpakkarnar bæði í Íslandi og í Føroyum, og tí varð mælt til at taka Ørkina við í Føroyska hjálparpakkan.

Hesum tók fíggjarnevndin undir við, og mælti løgtinginum til at játta 400 túsund krónur til sjómansheimið í Reykjavík. Og tað samtykti løgtingið áðrenn tað fór til hús í gjár.