Skrokkurin ikki sjósettur enn

Skrokkurin til nýggja uppsjóvarskipið hjá Christiani í Grótinum, sum er smíðaður í Gdynia í Póllandi, er ikki sjósettur enn. Eftir ætlan skuldi tað vera sunnudagin.

Okkurt gjørdi, at tað ikki bar til at flota skipið, sigur Bogi Rasmussen frá reiðarínum. Skipið verður sjósett í morgin ella hósdagin, sigur hann.

Tá skrokkurin er flotaður, verður hann sleipaður úr Póllandi til Skagen, har skipið verður gjørt liðugt.

M/S Christian í Grótinum, verður slakar 90 metrar langur og 17 metrar breiður, og fer at taka góð 3.000 tons av uppsjóvarfiski.

Eftir ætlan skal nýggja skipið latast eigarunum í januar. Byggikostnaðurin verður umleið 300 milliónir kr.