Svøríki snávaði móti Ukraina

Fótbólts-Svøríki syrgir í kvøld, tí fótbóltslandsliðið snávaði í áttandapartsfinaluni móti Ukraina. 

Svøríki var betra liðið, men eitt reytt kort bleiv avgerandi

Stóra stjørnan hjá Svøríki var enn einaferð Emil Forsberg, sum skoraði sítt fjórða mál í EM, og annars rakti bæði stong og tvørtræ. 

Hjá Ukraina var tað Manchester City-bakkurin Oleksandr Zinchenko, sum skaraði framúr. Zinchenko legði Ukraina á odda í 27. minutti eftir eitt sera hegnislig upplegg frá Andriy Yarmolenko. 

Emil Forsberg svaraði aftur í 43. minutti við einum fínum langskoti, ið rakti ein ukrainskan fót á veg í málið. 

Svøríki

Reyða kortið vendi dystinum

Svíar vóru oman á í seinna hálvleiki, men tað bleiv stong út, og tí endaði dysturin við umdysti.

Og her gekk galið hjá Svøríki, tá sterki miðverjin Marcus Danielson fekk reytt kort, tá hann var óheppin og stemplaði ein ukrainskan leikara á knæið, tá hann royndi at sparka bóltin burtur av vandaleið. 

Reyða kortið bleiv avgerandi, tí sviar megnaðu ikki at standa ímóti til endans, og í yvirtíðini í seinna hálvleiki av umdystinum, legði Zinchenko eitt sera hegnisligt innlegg inn á høvdið á innskifta Artem Dovbyk, sum stútaði bóltin í málið. 

Nú skal Svøríki heim, meðan Ukraina skal spæla fjórðingsfinalu móti Onglandi í Róm leygardagin. 

Ukraina

EM-áttandapartsfinalurnar 

Leygardagin 26. juni
1: Wales - Danmark 0-4 
2: Italia - Eysturíki 2-1

Sunnudagin 27. juni
3: Holland - Kekkia 0-2
4: Belgia - Portugal 1-0

Mánadagin 28. juni
5: Kroatia - Spaina 3-5
6: Frakland - Sveis 3-3 / 4-5 eftir brotssparkskapping

Týsdagin 29. juni
7: Ongland - Týskland 2-0
8: Svøríki - Ukraina 1-2

Fjórðingsfinalurnar

Fríggjadagin 2. juli
Sveis - Spaina (18:00, St Petursburg)
Belgia - Itala (21:00, München)

Leygardagin 3. juli
Kekkia - Danmark (18:00, Baku)
Ukraina - Ongland (21:00, Róm)