OL verður kanska uttan áskoðarar

Olympisku summarleikirnir í Tokyo verða kanska uttan áskoðarar.

Tað sigur japanski forsætisráðharrin Yoshihide Suga í dag, nú 23 dagar eru til leikirnir skulu byrja.

Í síðstu viku søgdu japansku myndugleikarnir, at alt eftir, hvussu koronastøðan er um tríggjar vikur, fer tað kanska at bera til at hava ítróttatiltøk við upp til 10.000 áskoðarum. 

Men tað hevur fingið nógv at tala at myndugleikunum. Tey siga, at tryggast av øllum hevði verið, at als eingir áskoðarar sleppa inn.

Tokyo meint rakt

Tokyo hevur verið meint raktur av koronusmittuni, og mikudagin vórðu 673 nýggir tilburðir staðfestir í býnum. 

Mitsuo Kaku, sum er heilsufrøðiligur ráðgevi hjá býráðnum í Tokyo, segði í dag, at støðan er um at vera hættislig.

Forsætisráðharrin Yoshihide Suga sigur, at avgerðin um at loyva áskoðarum skal takast í samráð við fýra ymsar partar. 

Hesir eru býráðið í Tokyo, altjóða olympiska nevndin IOC, altjóða paralympiska nevndin og so nevndin, sum skipar fyri sjálvum leikunum. 

Hann sigur, at eingin avgerð verður tikin hesum viðvíkjandi fyrr enn í fyrsta lagi í næstu viku.

Olympisku leikirnir í Tokyo byrja 23. juli.