Amerikanska løgmálaráðið stevnt Texas

Amerikanska løgmálaráðið hevur stevnt statin Texas, tí myndugleikarnir í Texas fyri góðari viku síðani herdu fosturtøkulógina í statinum.

Umstrídda lógin bannar fosturtøku eftir sættu viku í viðgongutíðini. Tað er áðrenn nógvar kvinnur vita, at tær eru við barn.

Og lógin ger hvørki undantak fyri siðamisbroti ella neyðtøku.

Hetta er sostatt strangasta lóg í landinum.

Umfatandi forboð
Lógin merkir, at tað nærum er bannað at fáa fosturtøku í amerikanska statinum.

Í Texas verða millum 85 og 90 prosent av øllum fosturtøkum framdar eftir viku seks, skrivar New York Times.

Løgmálaráðharrin í USA, Merrick Garland, hevur biðið um at lógin verður sett úr gildi ímeðan sakarmálið verður viðgjørt.

- Hendan lógin steðgar kvinnum í at brúka tey rættindi, sum tær eru tryggjaðar í grundlógini. Tað segði Merrick Garland við altjóða miðlar í gjárkvøldið.