Vænta størsta búskaparvøkstur í 50 ár

2021 kann gerast besta árið fyri heimsbúskapin í 50 ár, um bert sjálvur vøksturin verður tikin við.

Tað vísir ein meting, sum stovnurin fyri búskaparligt samstarv og menning, OECD, hevur gjørt. 38 lond eru í felagsskapinum.

OECD roknar við einum vøkstri í heimsbúskapinum í ár, sum er 5,7 prosent, og sum er á leið sama meting sum í mai.

Verður tað úrslitið, er tað størsta búskaparliga framstig síðani í 1973, tá vøksturin var 6,6 prosent.

3,6 prosent afturgongd í fjør

Stóri vøksturin í ár má samanberast við í fjør, tá koronukreppan hevði afturgongd við sær. Tá var afturgongdin í heimsbúskapinum 3,6 prosent.

Tí er einki løgið í, at vøksturin verður so stórur í ár, sigur OECD.

Næsta ár væntar OECD ein vøkstur í heimsbúskapinum upp á 4,5 prosent, skrivar Ritzau.