Guðmundur Joensen leiðari í Gulu smiðju í Runavík

Leiðari er nú settur til ungdóms- og virkishúsið Gula smiðja í Saltangará. 

Tað boðar Runavíkar kommuna frá á heimasíðuni.

Tað verður 38 ára gamli Guðmundur Joensen, sum hevur fjølbroyttar royndir, ið verður leiðari.

Guðmund Joensen kemur úr starvinum sum leiðari av Ítróttaháskúlanum í Vági, eitt starv hann røkti frá fyrstu fetum skúlans í 2016 og til í summar.

Undan tíð hevur hann m.a. roynt seg sum sjálvstøðugur handverkari og úrvalsítróttarfólk.

Nýtt ungdóms- og virkishús
Gula smiðja er nýggja ungdóms- og virkishúsið í Runavíkar kommunu, sum kemur at húsast í eyðkenda gula smiðjubygninginum miðskeiðis í Saltangará.

Umframt hugnaliga og mennandi samveru, so er ætlanin, at húsið skal nýtast til fjølbroytt mentanarligt virksemi, og verður Gula smiðja eftir ætlan klekingardepil fyri mentan millum ung á staðnum.

Guðmundur Joensen byrjar í starvinum í næstum. Fyrsta tíðin verður nýtt til at tilrættisleggja virksemið, sum skal vera í Gulu smiðju, tá hon letur upp, skrivar Runavíkar kommuna á heimasíðuni. 

>>NÓN VAR OG VITJAÐI GULU SMIÐJU FYRR Í HEYST. HOYR INNSLAGIÐ OG SÍGGJ MYNDIR AV GULU SMIÐJU HER.