Arbeiðið at umvæla gomlu læknahúsini í Klaksvík verður boðið út næsta ár

Gomlu læknahúsini í Klaksvík, kallað Gulu húsini, skulu umvælast, og arbeiðið verður boðið út fyrst í næsta ári.

Pengar eru til arbeiðið.

Tað sigur Kaj Leo Holm Johannesen, landsstýrismaður, sum hevur svarað spurningi frá Eyðgunn Samuelsen, løgtingskvinnu.

Í fíggjarlógini í ár eru seks milliónir krónur játtaðar til læknahúsini.

Næsta ár eru fimm milliónir ætlaðar og 10 milliónir í 2023.

Umsitingin skal flyta inn

Ætlanin er, at umsitingin hjá Klaksvíkar sjúkrahúsi flytur í gulu læknahúsini, tá tey er dagførd.

Gulu húsini vóru bygd í 1923. Landið eigur tey.

Nú tey verða dagførd, verða har 10 skrivstovupláss, fundarhøli, viðtaluhøli, arbeiðsklivar og skjalasavn.  

Eyðgunn Samuelsen spurdi

Eyðgunn Samuelsen spurdi eisini um starvsfólkabygningin hjá Klaksvíkar sjúkrahúsi, nær hann verður dagførdur.

Kaj Leo Holm Johannesen svarar, at arbeiðið við starvsfólkabygninginum er ikki komið so langt ávegis enn. 

Her er fyrsta stigið at viðgera hugskot til millum annað innrætting.