Elias í Sävehof í minst eitt ár afturat

Viðhaldsfólkini hjá svenska meistaraliðnum í hondbólti, IK Sävehof, fingu eina góða jólagávu í gjár, tá føroyski hondbóltsúrmælingurin, Elias á Skipagøtu, kunngjørdi, at hann verður verandi í felagnum minst eitt kappingarár afturat.

19 ára gamli hoyvíkingurin dylir annars ikki fyri, at hann ætlar at finna sær eitt størri felag. Tað sigur hann millum annað við Árið ið fer í ítrótti, sum verður send nýggjársdag.

Elias á Skipagøtu skifti frá H71 til stórliðið í Partille uttanfyri Göteborg fyri hálvum øðrum ári síðani, har hann longu hevur vunnið svenska meistaraheitið og nú telist millum teir eyðsýndastu spælararnar á liðnum. 

IK Sävehof er í løtuni á fyrsta plássi í bestu svensku deildini, og í Evropa League er felagið á 2. plássi aftanfyri týska oddaliðið, Magdeburg.

Í dag spælir Sävehof á heimavølli ímóti Eskilstuna GUIF, men Elias á Skipagøtu verður ikki við.

Hann hevur brotið kjálkabeinið, og verður uttanfyri í nakrar vikur. Føroyska hondbóltslandsliðið spælir HM-undankapping á heimavølli um miðjan januar, men Elias á Skipagøtu væntar, at hann verður klárur at spæla tá.