Donsk flogferðsla skal vera grøn

Danski forsætisráðharrin, Mette Frederiksen segði í nýggjársrøðu sínari, at Danmark setir sær sum mál, at fáa innanlands flogferðsluna grøna áðrenn 2030. 

Hon segði kortini, at loysnin fyri hvussu hetta skal uppnáast, er enn ikki funnin. Danmark setir sær sum mál, at hava minkað um samlaða útlátið við 70 prosentum í 2030, samanborið við støðið í 1990. 

- At ferðast er at liva, og tí flúgva vit, segði forsætisráðharrin, tá hon kunngjørdi ætlannia. 

Fyrr í ár setti svenska stjórnin sær líknandi mál, skrivar BBC. Í Svøriki er málið at hava grøna flogferðslu innanlands áðrenn 2030, og at hava grøna altjóða flogferðslu  í 2045.  Svenska stjórnin hevur eisini ætlanir um at økja avgjaldið á illa dálkandi flogfør. 

Í Fraklandi er ætlanin at bannað innanlands flúgving tey støð, har tað ber til at koma vegin fram við toki undir tveir og ein hálvan tíma.