Koronuraktar familjur í Klaksvík fáa spælipláss

Í dag og til 1. februar bjóðar Klaksvíkar kommuna spæliplássið í Kráargøtu til familjur, har korona er. Talan er um eina royndarskipan.

Jóhanna Christiansen, forkvinna í mentanarnevndini, sigur, at sera nógv børn í kommununi eru og hava verið smittað við koronu. Nógv hava sitið inni í langa tíð, og hjá teimum hevur tað uttan iva verið ein avbjóðing.

- Vit hava øll tørv á frískari luft og sosialari samveru, men tað kann tykjast trupult í einari slíkari støðu. Tí hava vit valt at bjóða spæliplássið í Kráargøtu til tær familjur, har korona ger um seg.

Spæliplássið í Kráargøtu er nýtt og stórt.

Kommunan setur skelti upp, sum kunnar um, at spæliplássið í hesum tíðarskeiði er tøkt hjá teimum, ið hava fingið staðfest koronu, skrivar kommunan.