Umleið fjórði hvør hevur ilt í búkinum

Í Føroyum hava vit hægsta títtleika í heiminum, tá tað snýr seg um kroniskar tarmsjúkur.

Tað merkir, at nógvir føroyingar - umleið fjórði hvør - hevur ilt í búkinum.

Men hvørji sjúkueyðkenni skalt tú halda vakið eyga við, og nær eigur tú at fara til lækna?

Hesum spurningunum svarar Katrin Olsen, sum er serlækni í gastroenterologi og hepatologi, í Heilsuhorninum hesa vikuna.

Sambært serlæknanum eru ávís sjúkueyðkenni, ið vit altíð eiga at reagera uppá.

- Blóð í avføringinum og broyting í avføringsmynstrinum samstundis sum tú kennir teg sjúkan, hevur ilt í búkinum og kanska fepurkenslu og tapir teg, hetta eru alarm-sjúkueyðkenni, sum tú skalt fara til lækna við, sigur Katrin Olsen, ið dagliga arbeiðir sum yvirlækni á Landssjúkrahúsinum á livur, maga, tarm ambulatoriinum.

Í Heilsuhorninum greiðir Katrin Olsen frá kroniskum tarmsjúkum og svarar spurningum frá lurtarum.

Sendingina kanst tú hoyra her.