Russland og Ukraina samráðast aftur í Hvítarusslandi

Nú klokkan 14 føroyska tíð byrja samráðingar millum Russland og Ukraina í hvítarussiska býnum Brest.

Dmitrij Peskov, sum er talsmaður hjá russisku forsetaskrivstovuni, sigur sambært Jyllands-Posten, at Russland er til reiðar at gevast við sínum atsóknum í Ukraina "nær sum helst" og so skjótt, sum Ukraina eftirlíkar russisku krøvunum.

Millum hesi krøvini eru, at Ukraina skal viðurkenna Krim sum russiskt øki. Russland tók Krim frá Ukraina í 2014. Somuleiðis skal Ukraina viðurkenna Donetsk og Luhansk har eysturi í Ukraina sum sjálvstøðug øki.

Broyta grundlóg

Eitt annað krav er, at Ukraina skal broyta sína grundlóg, so hon greitt sigur, at Ukraina er uttanveltað.

Talsmaðurin, Dmitrij Peskov, sigur eisini, at Russland hevur ongar ætlanir um at vinna sær landaøkir í Ukraina.

Hósdagin skal Turkaland vera vertur fyri samráðingum millum Russland og Ukraina. Tær samráðingarnar verða millum uttanríkisráðharrarnar hjá londunum báðum.

Turkaland er limur í NATO og sameint við Ukraina. Men Turkaland vil eisini fegið varðveita góða sambandið við Russland, ikki minst handilssambandið, sum hevur nógv at siga fyri turkiska búskapin.