Betri trygging hevði 114 mió. kr. í avlopi

Betri trygging hevði í 114 milliónir kr. í avlopi etir skatt í fjør.

Tað er munandi betri enn í 2020, tá ið úrslitið var 67 milliónir krónur.

- Munandi færri skaðar enn vanligt, eingin stórskaði í vinnuni, eingin ódn og væl færri privatir skaðar enn undanfarin ár. Knýta vit hesi viðurskiftini saman við einum støðugt vaksandi kundaskara, ið tryggjar seg betur enn fyrr, góðum úrsliti av íløgum og góðari fíggjarstýring, so hevur tú í stuttum orsøkina til framúr góða úrslitið í 2021, sigur Ingunn Eiriksdóttir, forstjóri í Betri Trygging í tíðindaskrivi

Í fjør vóru 209 milliónir krónur útgoldnar í skaðaendurgjøldum.  Fyrraárið var talið 382 milliónir krónur.

10.700 skaðar

Í fjør vóru 10.700 skaðar, men í fyrraári vóru teir 12.700.

Eginognaravkastið í fjør var 15,2 prosent, meðan tað var 9,7 prosent í 2020.

Í apríl í ár fara kundarnir hjá Betri trygging á fyrsta sinni at fáa vinningsbýti. Hetta verður goldið beinleiðis inn á konto, og upphæddin, sum verður útgoldin, er umleið 10% av tryggingargjaldinum hjá hvørjum einstøkum kunda.

Ingunn Eiriksdóttir

Ingunn Eirikisdóttir er forstjóri í Betri trygging.