Taka friðarsamráðingarnar uppaftur

Forsetin í Turkalandi, Recep Tayyip Erdogan, váttar, at friðarsamráðingarnar millum Russland og Ukraina verða tiknar uppaftur í turkiska býnum Istanbul í næstum.

Samráðingarnar verða longu í dag ella í morgin, skrivar CNN.

Erdogan hevur í hesum sambandi tosað í telefon við russiska forsetan, Vladimir Putin. Sambært einum talsfólki hjá turkisku stjórnini, segði hann við Putin, at ein vápnahvíld millum partarnar er alneyðug.

Fleiri samráðingar hava verið millum Russland og Ukraina seinastu tíðina. Tó uttan úrslit.

Uttanveltað land

Eitt krav frá Russlandi er, at Ukraina verður eitt sonevnt uttanveltað land.

Tað hevur Ukraina higartil sýtt fyri. Síðani 2019 hevur tað staðið í ukrainsku grundlógini, at landið vil gerast partur av Nato.

Men nú bendir alt á, at Ukraina vil samráðast um at gerast eitt uttanveltað land. Ukrainski forsetin, Volodymyr Zelenskyj segði við russisk tíðindafólk í gjár, at Ukraina sum eitt uttanveltað land verður partur av komandi friðarsamráðingunum við Russlandi.

Tó leggur hann dent á, at skal Ukraina gerast uttanveltað land, skal hetta váttast av einum triðjaparti, og málið skal eisini til fólkaatkvøðu fyrst.