Fiskivinnuavtalan skal dagførast

Fiskivinnuavtalan millum Føroyar og Grønland skal dagførast. Hon er frá 1997.

Men enn er ikki avgjørt, hvussu hon skal broyast.

Fiskivinnuavtalan var á skránni hjá Múte B. Egede, landsstýrisformanni, og Bárði á Steig Nielsen, løgmanni, sum hittust í Grønlandi nú í vikuni.

Almenna vitjanin hjá løgmanni í Grønlandi endaði í gjár. 

Múte B. Egede segði á tíðindafundi í gjár, at almenna fyrisitingin í Grønlandi kann gerast einfaldari og effektivari eftir føroyskari fyrimynd. 

Grønland og Føroyar eru ikki samd um, hvussu friðurin í Norðuratlantshavi skal varðveitast. Føroyar vilja hava eftirlit við radara, men Grønland ivast enn.

Hittast aftur í summar

Múte B. Egede og Bárður á Steig Nielsen hittast aftur í Føroyum í juni. Ríkisfundur verður 9.juni. 

Múte B. Egede kemur tá eisini á almenna vitjan í Føroyum.

Semjusøkjandi tíðir eru í ríkisfelagsskapinum, og okkara viðurskifti við Grønland eru góð, sigur Bárður á Steig Nielsen, løgmaður.

Hann er sannførdur um, at Føroyar og Grønland fara at samstarva enn meira í framtíðini.