Pávin ætlar sær til Ukraina

Frans pávi ætlar sær til ukrainska høvuðsstaðin, Kyiv, eftir at hava fingið innbjóðing frá bæði borgarstjóranum og forsetanum, Zelenskyj.

Pávin er í hesum døgum á vitjan á Malta, og har var hann spurdur, um hann ætlar sær til Ukraina.

Pávin svaraði, at tað er framvegis ein møguleiki.

Borgarstjórin í Kyiv, Vitali Klitschko, sendi 8. mars pávanum innbjóðing at koma til høvuðsstaðin í kreppurakta landinum.

Rudda slóð fyri friði

Borgarstjórin segði, at pávavitjanin hevur týdning, tá ræður um at bjarga mannalívum og at rudda slóð fyri friði í býnum og Ukraina.

23. mars helt ukrainski forsetin, Zelenskyj, talgilda røðu fyri italska tinginum, og tá nýtti hann eisini høvi at bjóða pávanum til Ukraina á vitjan. 

Russland gjørdi innrás í Ukraina 24. februar, og higartil eru fleiri enn fýra milliónir fólk flýdd av landinum undan krígnum.