Taliban krevur burka

Afganskar kvinnur skulu lata seg í klæðir, ið fjala allan kroppin og høvdið.

Tað hevur Taliban givið boð um í dag, sambært TV2.

Eygleiðarar meta, at talan er um strangasta tiltak, sum bólkurin hevur sett í verk síðan hann tók valdið í landinum í august í fjør. 

Siðvenja og sharia
Boðini koma frá ovasta leiðaranum í Taliban, Hibatullah Akhundzada.

- Tær skulu vera ílatnar klæðum frá topp til tá, soleiðis sum siðvenjan áleggur og fyri at vísa virðing, stendur í boðunum frá Taliban.

Í skrivinum verður grundgivið fyri, at tað er sharia-lóggávan og siðvenjur, sum áleggja hetta. Sharia er ein lógarskipan innan Islam. 

- Kvinnur, sum ikki eru ov gamlar ella ungar, skulu fjala andlitið við undantaki av eygunum, soleiðis sum sharia áleggur. Hetta fyri at sleppa undan stríði, tá tær møta monnum, sum ikki eru í nærmastu familju, verður skrivað. 

Sambært Reuters tíðindastovan verður mælt til, at kvinnur ganga í einum bláum burka. Ein burka fjalir bæði likam og andlit. Eyguni verða fjald aftanfyri eitt net. 

Sambært Reuters verða mannligir familjulimir hóttir við fongsulsrevsing ella við uppsøgn, um kvinnurnar ikki akta boðunum.