Stórur partur av troli og neti kann endurvinnast

Í 2030 ætlar trolvirkið Vónin at taka ímóti størri nøgdum av troli og neti til endurvinning, enn virkið selur viðskiftafólkunum.

Sum ein av 12 føroyskum fyritøkum í felagsskapinum, Burðardygt vinnulív, hevur Vónin sett sær sum mál at gerast "net-positivt", sum tikið verður til, fyri 2030, sigur Vónin á heimasíðuni.

Burðardyggi málsetningurin hjá Vónini stavar m.a. frá stórum reiðaríum, sum hava tørv á at greiða sínum kundum frá, hvussu tey fara við náttúruni, og hvussu dálkingin í sjónum er ein vaksandi trupulleiki. Harumframt hevur virkið staðfest, at ein stórur partur av trolunum verður tyrvdur.

75 til 85 prosent kunnu endurvinnast

Í 2020, sum er útgangsstøði fyri burðardyggu málunum, seldi Vónin 3.400 rúmmetrar av útgerð til fiski- og alivinnuna.

Verða gomul trol og net handfarin rætt, kunnu 75 til 85 prosent endurvinnast. Eitt nú verður netið smeltað til plast á endurvinningarfyritøku í Danmark, sum IRF samstarvar við.

Á alideildini við Norðskála hevur Vónin seinastu árini savnað saman 240 nótir, ið hava tænt fyri seg í vinnuni. Nótirnar verða nú sendar til Noregs til endurvinningar.