Fara eftir triðja plássinum

Føroyska U21-landsliðið fer eftir sigrinum og triðja plássinum í bólkinum, tá Serbia vitjar við Djúpumýrar í Klaksvík seinnpartin.

Hetta er síðsti dysturin í hesi undankappingini, og undan dystinum er Serbia á triðja plássi við 11 stigum. Føroyar eru tvey stig aftanfyri, og yvirhála tískil Serbia við einum sigri.

 - Hetta er ein stórur dystur fyri okkum, tí vit hava møguleika fyri at enda á triðjaplássinum, og vit fara sjálvandi eftir at røkka tí málinum, sigur landsliðsvenjarin, Sámal Erik Hentze, við heimasíðuna hjá Fótbóltssambandi Føroya.

Tað eydnaðist Føroyum at fáa javnleik á útivølli ímóti serbum í fjør - bert eitt av fleiri góðum úrslitinum, sum U21-landsliðið hevur fingið í hesi kappingini.
 
 - Vit hava fyrr prógvað, at vit kunnu standa okkum væl móti teimum bestu, og tað ætla vit okkum eisini at gera í morgin, sigur Sámal Erik Hentze.

Seinast gekk kortini ikki so væl. Føroyar taptu 4-0 fyri Ukreina.

Dysturin byrjar klokkan 16.15.