Havbúnaðarfelagið: Kappingarneytarnir eru nógv betur fyri

Londini, sum føroyingar kappast við um at selja laks, eru nógv betur fyri enn Føroyar.

Tey hava fríhandilsavtalur við fleiri lond og fleiri veterinerar avtalur.

Flestu aðrar alitjóðir eru í samráðingum um nýggjar fríhandilsavtalur. Føroyar hava ongar samráðingar um nýggjar avtalur.

Tað sigur Havbúnaðarfelagið.

Bakkafrost

(Mynd: Bjarni Árting Rubeksen)

Marknaðaratgongdin avbjóðing

Felagið sigur, at marknaðaratgongdin er framvegis ein avbjóðing.

Fríhandilsavtalur við lond í Asia, serliga Kina og Suðurkorea, hava stóran týdning. Brúk er eisini fyri veterinerum avtalum við Avstralia og Brasil.

Í fríhandilsavtaluni við ES er ein lítil tollfrí kvota fyri ávísar virkaðar laksavørur, sum kann forða fyri, at nýggjar víðarivirkaðar vørur úr laksi verða mentar, sigur Havbúnaðarfelagið. 

Aðalfundurin hjá felagnum heitti á nevndina um at kanna og lýsa møguleikan fyri, at Føroyar gerast partur av størri skipanum ella sambondum, sum kunnu geva føroyskum alifyritøkum og øðrum útflytarum lættari atgongd til nýggjar fríhandilsavtalur.