Samhugaverkfall fær ikki avleiðingar fyri ferðafólkini

Tað fer ikki at merkjast hjá ferðafólkunum, at flogmekanikarnir hjá SAS nú fara í samhugaverkfall.

Á midnátt fóru 200 flogmekanikarar í samhugaverkfall, tí teir vilja vísa flogskiparunum stuðul.

Ferðafólk, ið skulu ferðast við SAS, nýtast ikki at stúra fyri ferðini, sigur kunningarleiðarin í Danmark við TV2.

– Samhugaverkfallið fer ikki at ávirka flogferðirnar, tí vit hava aðrar loysnir klárar til mekaniska viðlíkahaldið, sigur Alexandra Lindgren Kaoukji.

Ætlanin er at viðlíkahalda flogførini í øðrum floghavnum enn teimum donsku.

Hetta fer tó møguliga at leingja um flogtíðina, tá ið verkfallið er av, og tey flogfør, sum ikki verða viðlíkahildin í løtuni, skulu eftirkannast. 

Samhugaverkfallið er ein avleiðing av ósemjuni millum umleið 900 flogskiparar og leiðsluna hjá skandinaviska flogfelagnum.

Mánadagin fóru flogskipararnir hjá SAS í verkfall, tí partarnir ikki kundu semjast um ein nýggjan sáttmála fyri tann, sum fór úr gildi 1. april. 

Umleið helvtin av øllum ætlaðu fráferðunum hjá SAS eru avlýstar.