Fimm fólk og eitt felag hava keypt fastogn

Fimm fólk og eitt felag hava fingið loyvi frá landsstýrinum til keypa fastogn í Føroyum sambært lógini, sum kom hálvan desember í fjør. 

Meginreglan í teirri lógini er, at fólk og feløg, sum ikki hava havt fastan bústað í danska ríkinum í samanlagt fimm ár, skulu hava loyvi frá landsstýrinum, ætla tey at keypa hús í Føroyum.

Lógin skal forða fyri, at útlendingar keypa ov nógv hús í Føroyum uttan at hava persónligt ella vinnuligt tilknýti til Føroya.

Men lógin skal eisini tryggja, at ikki vera settar óneyðugur forðingar fyri útlendskum vinnuvirksemi í Føroyum, virksemi, sum er føroyska samfelagnum at gagni.