Flogbóltsmenninir spæla síðsta undankappingardystin

Føroyska flogbóltslandsliðið við monnum spælir sín seinasta EM-undankappingardyst í dag. Hann er ímóti Belgia í høllini á Hálsi í Havn klokkan 17.00. 

Belgia hevur tryggjar sær pláss í EM-endaspælinum, so væntað verður, at útiliðið ikki sendir sítt sterkasta lið á vøllin, skrivar Flogbóltssambandið.

Føroyar hevur tapt allar sínar dystir higartil, men á útivølli ímóti Estlandi seinast vóru kortini glottar at hóma og settúrslitini vóru munandi javnari hóast 3-0 tap.

Flogbóltslandsliðið við kvinnum fer undir sína undankapping í dag. Føroysku kvinnurnar hava stóra avbjóðing fyri framman á útivølli ímóti Kroatia.

- Vónirnar at vinna dystin eru ikki stórar, sigur Lars Engell, høvuðsvenjari, men vit mugu gera okkara besta og brynja leikararnar til slíkar dystir. Hetta skal so gera føroysku leikararnar klárar at møta lutfalsliga veikari mótstøðu seinni í kappingini og har møguliga vinna dystir, sigur venjarin í tíðindaskrivi frá Flogbóltssambandinum.