Japan kúvendir í spurninginum um kjarnorku

Japan ætlar nú at lata fleiri kjarnorkuverk uppaftur og at menna nýggj kjarnorkuverk.

Tað kunngjørdi japanski forsætisráðharrin, Fumio Kishida, í morgun.

Við hesum kúvendir Japan í spurninginum um kjarnorku, skrivar Reuters-tíðindastovan.

Í løtuni eru sjey av 31 kjarnorkuverkum virkin í Japan, og av teimum eru trý undir umvæling. 

Verk lótu aftur

Flestu kjarnorkuverk í Japan lótu aftur, í kjalarvørrinum av vanlukkuni á Fukushima-kjarnorkuverkinum í 2011, har 10 metrar stórar flóðaldur skolaðu inn yvir kjarnorkuverkið eftir ein stóran jarðskjálvta.

Kjarnorkuverkini skulu vera partur av ætlanini at røkka grønum orkumálum, og at fyribyrgja einari møguligari orkukreppu, eftir ógvusliga príshækkingarnar seinastu tíðina.

Ætlanin er at seta nøkur kjarnorkuverk í gongd aftur, áðrenn veturin kemur, skrivar Reuters.