Hóast lógarkrav hava allar kommunur ikki sett integratiónssamskipara

1. juli gjørdist tað eitt lógarkrav, at allar kommunur í landinum skulu hava integratiónssamskipara. 

Flestu kommunur hava sett integratiónssamskipara, meðan aðrar hava avgjørt at samstarva um ein. 

Men í Sands-, Nes-, Sjóvar-, Sunda- og Eiðis kommunu er eingin beinleiðis integratiónssamskipari settur enn. 

Í Nes kommunu hevur kommunustjórin, Elsbet Ellingsgaard Magnussen, í fyrstu atløgu átikið sær uppgávuna at vera integratiónssamskipari aftrat kommunustjórastarvinum. 

Sóley Sjúrðaberg

Í Sjóvar og Sunda kommunu røkja verandi trivnaðarfólk starvið sum integratiónssamskiparar. 

Á Eiði hava tey sett Paulu Bøgesvang, lærara, at vera tímaløntur integratiónssamskipari. 

Einasta stað í landinum, har eingin integratiónssamskipari er settur, er í Sandoynni, har arbeitt verður við málinum. 

Norðanfyri hava tær sjey kommunurnar valt at ganga saman um ein integratiónssamskipara. 

1. mai bleiv Sóley Sjúrðaberg sett sum integratiónssamskipari í Klaksvíkar-, Fuglafjarðar-, Eystur-, Kunoyar-, Hvannasunds-, Viðarreiðis- og Fuglaoyar kommunu. 

Hoyr samrøðu, sum Herbjørg H. Jøkladal gjørdi við Sóley Sjúrðaberg í útvarpstíðindunum: