Verri dygd á smáum vatnverkum

Norðurlendskir granskarar vóru fyrr henda mánaðin í Føroyum á eini verkstovu, ið snúði seg um drekkivatn, skrivar heimasíðan hjá Granskingarráðnum.

Gransking hevur áður víst, at dygdin á drekkivatni er verri í smáum vatnveitingum enn størri vatnveitingum.

Meginparturin av føroyska drekkivatninum kemur frá júst smáum vatnveitingum, so tí er eyðsæð, at føroyskur áhugi er fyri at vera við í slíkari gransking.

Ein av niðurstøðunum er, at skal betri drekkivatnstrygd fáast, er neyðugt við eini váðagrundaða tilgongd.

Hetta háttalag hevur tó sínar avbjóðingar, tá talan er um smærri vatnveitingar.

Í hesum sambandi hava granskararnir samskift við myndugleikar, umframt smærri vatnverk í norðurlondum, fyri at eyðmerkja forðingar og møguligar loysnir, so ein váðagrundað tilgongd kann setast í verk.

Verkstovan, sum var frá 9. til 11. august, hevði til endamáls at gera arbeiðið liðugt, so úrslit og møguligar loysnir kunnu útgevast í fróðskaparritum og sum tilmæli at handa politikarum og myndugleikum á økinum.

Arbeiðið byggir víðari á grein, sum varð almannakunngjørd á ScienceDirect á heysti 2020.