- Tíðindi, mentan og ítróttur
Sett mini-GPS-sendarar á drunnhvítar
Sett mini-GPS-sendarar á drunnhvítar
Á fyrsta sinnið hava granskarar sett GPS-sendarar á drunnhvíta, fyri at staðfesta hvar drunnhvítar leita sær føði
Mini-GPS-sendarar eru settir á drunnhvítar í Nólsoy, fyri at skilja, hvørja ávirkan eitt nú havvindmyllulundir og aliøkið kring Føroyar hava á drunnhvítan
Mynd: Hannah Hereward
06.09.2022 - 16:54
Fríggjadagin varð ein mini-GPS-sendari settur á ein drunnhvíta í Nólsoy.
Leygardagin fleyg fuglurin úr reiðrinum og var burturi í tveir dagar, áðrenn hann kom aftur mánadagin, tá granskararnir síðani tóku GPS-sendara av aftur.
Tá var staðfest, at drunnhvítin hevði verið nærum 160 km í ein landsynning úr Nólsoy, næstan hálvan vegin til Hetlands, tá hann var longst burtur frá reiðrinum í Nólsoy.
Granskingarverkætlanin hevur sum endamál at skilja, hvørja ávirkan eitt nú havvindmyllulundir og aliøkið kring Føroyar hava á drunnhvítan.
Tað eru granskarar frá lærda háskúlanum í Cardiff, Umhvørvisstovuni, Hiddenfjord, umframt Jógvan Thomsen og Jens-Kjeld Jensen, sum standa fyri verkætlanini.
Størsti parturin av heimsins drunnhvítastovni reiðrast í Føroyum, og granskararnir vóna at seta fleiri GPS-sendarar á fleiri drunnhvítar bæði í ár og komandi ár, fyri at fáa meira vitan til høldar um drunnhvítan.
Ein drunnhvítaungi.
Er kopiera
Nýggjastu sendingar í ÚV
Nýggjastu sendingar í SV
