Havbúnaðarfelagið: Størri tøkugjald fer at ávirka íløguhugin

Havbúnaðarfelagið heldur lítið um uppskotið hjá landsstýrinum um at hækka tøkugjaldið hjá alivinnuni.

Tað fer at ávirka hugin og møguleikarnar at gera íløgur í alivinnuna, sum fer at gjalda tað, sum svarar til dupultan partafelagsskatt, um tøkugjaldið verður hækkað soleiðis, sum landsstýrið ætlar, sigur Havbúnaðarfelagið.

Stórur partur av yvirskotinum hjá alivinnuni fer til íløgur, sigur Havbúnaðarfelagið. Summi ár eru íløgurnar størri enn sjálvt ársúrslitið hjá alifyritøkuni.

Nógvur skattur

Havbúnaðarfelagið sigur, at neyvan í nøkrum landi er so nógvur skattur lagdur á alivinnuna sum í Føroyum.

Felagið sigur, at lógin er ofta broytt við sera stuttum skotbrá og avmarkaðari viðgerð.

Hesaferð er hoyringarfreistin góðir tveir arbeiðsdagar.