Fólkatalið er minkað í 12 kommunum

Færri fólk búðu í 12 kommunum 1.september í ár enn 1.september í fjør.

Nógv størsta kommunan í Føroyum er Tórshavnar kommuna. Har búgva 23.000 fólk, 43 prosent av fólkatalinum í Føroyum.

Næst Tórshavnar kommunu eru Klaksvíkar kommuna við 5.400 fólkum og Runavíkar kommuna við góðum 4.300 fólkum.

Tey svara til ávikavist 10 og átta prosent av fólkatalinum.

Størsti vøkstur í Nes kommunu

Størsti vøksturin í fólkatalinum seinasta árið var í Nes kommunu, har tað vaks fýra prosent.

Síðani kemur Eiðis kommuna, har er vøksturin 3,6 prosent.

Størsta minkingin í fólkatalinum frá 1.september í 2021 til 1.september í ár var í Húsavíkar kommunu, har fólkatalið minkaði 6,3 prosent.

1.september í ár búðu 54.081 fólk í Føroyum, - tað eru 636 fleiri enn 1.september í fjør.