Valplakatir mugu ikki vera til ampa fyri ferðsluna

Valplakatir mugu ikki vera til ampa fyri ferðsluna, órógva útsýnið á vegunum, ella fjala ferðsluskelti. Valplakatir eiga ikki at vera í rundkoyringum og á ferðsluoyggjum.

Ráðið fyri Ferðslutrygd, Kommunufelagið, Landsverk og politiið hava gjørt vegleiðing um valplaktir.

Tey biðja fólk um ikki at seta valplakatir á steyrar við ferðsluskeltum ella aðrari góðkendari ferðslumerking.

Valplakatir kunnu heingjast á lyktasteyrar ella annan útbúnað, sum er gjørdur til endamálið.

Skulu festast forsvarliga

- Heingið valplakatirnar minst 2,3 metrar yvir gongubreyt ella súkklubreyt og minst hálvan metur frá vegjaðara, ljóða boðini.

Og boðini eru eisini at festa plakatirnar forsvarliga á veðurdyggar plátur og á slíkan hátt, at tær ikki gera skaða á lyktasteyrar, garðar og annað.

Vegleiðingin er millum annað á heimasíðuni hjá Landsverki.