Trý vilja verða stjóri í Hondbóltssambandinum

Tríggjar umsóknir eru komnar til starvið sum stjóri í Hondbóltssambandi Føroyar.

Freistin at søkja var í gjár, og forkvinnan í starvsnevndini, Gunn Ellefsen, sigur, at umsóknirnar eru áhugaverdar.

Ein setanarbólkur er settur, og miðjað verður ímóti at seta starvið sum skjótast, sigur forkvinnan.

Gunn Ellefsen sigur, at vaksandi virksemi hjá Hondbóltssambandinum við regluligum HM og EM-undankappingum og ikki minst endaspølum hevur nógv krøv við sær.

Nýggi stjórin skal millum annað tryggja, at HSF livir upp til hesi krøv.

Umframt hetta, skal nýggi stjórin millum annað taka sær av teimum nógvu fyrisitingarligu uppgávunum, sum fylgja við stóra vøkstrinum, sum hevur verið seinastu árini. 

Bæði í altjóða virkseminum, men eisini viðvíkjandi heimligu kappingunum, sum eisini verða raðfestar høgt, sigur Gunn Ellefsen.