Dómur í Eikmálinum 22. november

Týsmorgunin 22. november kemur dómurin hjá Eystara landsrætti í Eikmálinum.

Tað stendur í rættarlistanum hjá Landsrættinum.

Málið er millum Fíggjarligt støðufesti og teir tríggjar Eikmenninar, Marner Jacobsen, sum var forstjóri, Frithleif Olsen, sum var nevndarformaður, og Odd Bjellvåg, sum var næstformaður í Eik.

Teir tríggir Eikmenninir vóru í Føroya rætti 18. november 2019 dømdir at rinda tilsamans 150 milliónir krónur í endurgjaldi til Fíggjarligt støðufesti í sambandi við, at Eik banki kollsigldi. Teir kærdu dómin til Landsrættin.

Eikmálið, fráboðan um dóm í Eikmálinum

Her er fráboðanin frá Landsrættinum í rættarlistanum um, at dómur fellur í Eikmálinum 22. november. 

Krevja frídøming ella linari revsing

Í Landsrættinum krevja teir frídøming, ella, í øðrum lagi, at skula gjalda minni enn 150 milliónir krónur.

Fíggjarligt støðufesti krevur, at dómurin hjá Føroya rætti verður staðfestur.

Málið byrjaði í Landsrættinum 26. apríl. 25 rættardagar vóru settir av.

Fimta deild hjá Eystara landsrætti, tríggir dómarar, kemur til Føroya 21. november.