Sjey milliónir til nýggjar verkætlanir um havgransking

Faknevndin fyri skránna um havgransking í Norðuratlantshavi hevur játtað 6,8 mió. kr. til tvær nýggjar verkætlanir.

Tað upplýsir Granskingarráðið.

Hetta er annað játtanarumfarið frá granskingarskránni, sum danska stjórnin hevur játtað stuðul til í tíðarskeiðnum 2020-2023.

Endamálið við skránni er at styrkja samstarvið millum Grønland, Føroyar og Danmark um havgransking í Norðuratlantshavi.

Átta umsóknir

Verkætlanirnar fevna um ph.d., post.doc. og masterlesandi og hava luttakarar frá stovnum í Grønlandi, Føroyum og Danmark.

Átta umsóknir vóru komnar, tá freistin fór 25. august. Faknevndin setti eina altjóða serfrøðinganevnd at meta um góðskuna á verkætlanunum.

Faknevndin grundaði sínar avgerðir á metingarnar og raðfestingina hjá serfrøðinganevndini, og á strategisku raðfestingina í útbjóðingartekstinum.