Innflutningurin vaks 39 prosent

Innflutningurin fyrstu tíggju mánaðirnar ár var 10,5 milliardir krónur, ella 39 prosent størri enn somu tíð í fjør, vísa tøl hjá Hagstovuni.

Verða skip og flogfør ikki tald við, er vøksturin 25 prosent.

Innflutningurin alt árið í fjør var 9,3 milliardir kr., og tað var met.

Sostatt er innflutningurin fyrstu tíggju mánaðirnar í ár 13 prosent størri enn alt árið í fjør.

Oljuprísurin sæst aftur í innflutningtølunum. Vit hava innflutt brennievni fyri 2,1 milliard kr., ella góð 85 prosent meira enn somu tíð í fjør.

Annars stavar vøksturin í innflutninginum frá tilfari og øðrum til vinnulívið. Vøksturin er millum 20 og 30 prosent.

Vøksturin til beinleiðis nýtslu er bara eitt prosent.