Tríggjar kommunur fingu minni skatt í fjør

Bara tríggjar kommunur fingu minni skatt í fjør enn í 2021.

Allar hinar fingu meira skatt, summar væl meira enn árið fyri.

Fugloyar kommuna fekk 11,5 prosent minni í fjør, Skúvoyar kommuna 5,8 prosent minni, og Fámjins kommuna fekk 5 prosent minni í fjør enn í 2021.

Hetta eru lítlar kommunur, so tølini eru smá.

10 prosent meira

Summar kommunur fingu yvir 10 prosent meira í kommunuskatti í fjør enn árið fyri.

Kunoy fekk 12 prosent meira, Húsavík eisini 12 prosent meira, Hvalba 11 prosent, Sumba 11 prosent, Skálavík somuleiðis 11 prosent, og Eiði 10 prosent meira í kommunuskatti í fjør enn í 2021.  

Samanumtikið fingu kommunurnar 120 milliónir meira í skatti í fjør enn í 2021, svarandi til 5,7 prosent. 

Landsskatturin var 7,7 prosent størri og kirkjuskatturin 6,7 prosent. Eftirlønarskatturin var 11,4 prosent størri í fjør enn í 2021.