Javnseta nú vanligan og talgildan post

Fyri 10 árum síðani bleiv Mínboks sett í verðina, men síðani tað hevur skipanin livað eina tilveru í lógloysi. 

Lógin um hana er ongantíð farin gjøgnum løgtingið. 

Men nú er lógin send til hoyringar. 

Fíggjarmálaráðið sigur, at Mínboks lýkur krøvini um trygt talgilt samskifti, eisini krøvini, sum eru í dátuverndarlógini. 

Partur av Vanganum

Gjaldstovan keypti postkassan Mínboks í 2017 frá Elektron í sambandi við arbeiðið hjá Talgildu Føroyum.

Mínboks er nú ein sameindur partur av Vanganum. 

Postur, sum í dag verður sendur gjøgnum talgildu skipanina, hevur ikki somu rættarligu støðu sum postur, sum verður sendur í brævbjálva. 

Talgildu Føroyar, Vangin

Javnseta vanligan og talgildan post

Endamálið við lógini, sum nú er á veg, er at javnseta vanligan post við talgildan post, geva honum somu rættarligu støðu.

Í dag brúka 33.700 fólk Mínboks.

35 fyritøkur og almennir stovnar brúka Mínboks. 

Í 2021 vóru 625.807 brøv send umvegis Mínboks.

Kostar 16.000 kr. at knýta seg uppí

Fyritøkur og stovnar gjalda 16.000 kr. at knýta seg í Mínboks.

Harumframt skulu tey rinda fyri hvørt brævið.

Miðalprísurin fyri brævið var minni enn tríggjar krónur í 2021, sigur Fíggjarmálaráðið.

Annars gjalda brúkarar einki fyri at brúka Mínboks.