- Tíðindi, mentan og ítróttur
Føroyar limaskap í Nordforsk
NordForsk er stovnur undir norðurlendska ráðharraráðnum, sum fíggjar og stuðlar undir norðurlendskt samstarv um gransking og granskingarinfrakervi.
Hóast tað leingi verið eitt politiskt ynski at fáa sjálvstøðugan limaskap, er tað ikki borið á mál fyrr enn nú.
Fyri skjótt einum ári síðani søkti Uttanríkis- og Mentamálaráðið vegna Føroyar um limaskap, og viðgerðin hevur verið drúgv við hoyringum og fundum á fleiri stigum.
Beint fyri ársskiftið varð staðfest, at Føroyar fingu limaskap og at viðtøkurnar fyri NordForsk eru tillagaðar samsvarandi.
Annika Sølvará, sum hevur verið eygleiðari í stýrinum fyri Føroyar, heldur nú fram sum limur.
Næsta stigið á leiðini hjá Føroyum er at vera við í átøkum hjá NordForsk við fígging til føroyskar luttakarar.
Væntandi verður fígging til hetta sett av á fíggjarlógini fyri 2023.