Hernaðarkvett kann verða framt móti Putin

So leingi kríggið í Ukraina heldur á, og Russland merkir revsitiltøkini frá vesturheiminum, veksur eisini møguleikin fyri, at eitt hernaðarkvett kann verða framt móti russiska forsetanum, Vladimir Putin.

Tað segði fyrrverandi røðuskrivarin hjá Putin, Abbas Gallyamov, í samrøðu við CNN fyrr í vikuni.

Gallyamov, sum í dag arbeiðir sum politiskur viðmerkjari, vísir á, at undirtøkan fyri Putin kann minka skjótt, um Russland ikki ger framstig í krígnum í Ukraina.

Kríggið er tapt

- Russiski búskapurin versnar. Kríggið er tapt. Fleiri og fleiri deyð herfólk verða send aftur til Russlands, so russarar fáa fleiri trupulleikar og fara at spyrja seg sjálvar, hví alt hetta hendir. Teir fara at hyggja uttan um seg og svara sær sjálvum, at tað er tí, at landið verður stýrt av einum gomlum einaræðisharra, segði Gallyamov.

Hann sigur, at hetta kann henda innan fyri eitt ár.

Kann avlýsa forsetavalið

Abbas Gallyamov sigur eisini við CNN, at hann verður ikki bilsin, um Vladimir Putin fer at avlýsa forsetavalið, sum skal vera í mars 2024, um hann ikki ger verulig framstig í Ukraina.

- Uttan sigur í Ukraina fær hann trupulleikar við russarum. Russarar hava ikki brúk fyri honum, um hann ikki er sterkur. Hann kann gott finna uppá at lýsa undantaksstøðu og avlýsa forsetavalið, sigur Gallyamov.