KAF: Stytt arbeiðsvika hækkar lønina meira enn átta prosent

Verður arbeiðsvikan stytt úr 40 tímum niður í 37 tímar um vikuna, fer tað at hava við sær, at tímalønin hækkar 8,1 prosent.

At stytta arbeiðsvikuna fer eisini at hava við sær, at kommunurnar koma undir størri trýst við at manna øll størv og vaktir á t.d. eldraøkinum og á dagstovnaøkinum.

Tað sigur formaðurin í Kommunala arbeiðsgevarafelagnum, Per Martin Gregersen, í skrivi í dag.

Inntriv í samráðingarrættin

Kommunala arbeiðsgevarafelagið sigur, at ætlanin hjá landsstýrinum at stytta arbeiðsvikuna við lóg, er eitt beinleiðis inntriv í samráðingarrættin hjá kommununum.

KAF tekur undir við sjónarmiðinum hjá Føroya arbeiðsgevarafelag um, at tað eru partarnir á arbeiðsmarknaðinum, sum í sáttmálasamráðingum eiga at loysa spurningin um arbeiðstíðina.

Verður arbeiðstíðin stytt við lóg, fer hetta uttan iva at hava ávirkan á komandi sáttmálasamráðingar, sigur Per Martin Gregersen, formaður í Kommunala arbeiðsgevarafelagnum.

Samrøða verður við Per Martin Gregersen í útvarpstíðindunum klokkan 18.